sed illos quidem natura in haec gravitatis vestigia deduxit, Socrates autem Graecae doctrinae clarissimum columen, cum Athenis causam diceret defensionemque ei Lysias a se compositam, qua in iudicio uteretur, recitasset demissam et supplicem, inminenti procellae adcomodatam, "aufer" inquit "quaeso istam: nam ego, si adduci possem ut eam in ultima Scythiae solitudine perorarem, tum me ipse morte multandum concederem." spiritum contempsit, ne careret gravitate, maluitque Socrates extingui quam Lysias superesse.