"καὶ τὰ λογικὰ ἄκαρπά ἐστι." καὶ περὶ τούτου μὲν ὀψόμεθα. εἰ δ' οὖν καὶ τοῦτο δοίη τις, ἐκεῖνο ἀπαρκεῖ ὅτι τῶν ἄλλων ἐστὶ διακριτικὰ καὶ ἐπισκεπτικὰ καὶ ὡς ἄν τις εἴποι μετρητικὰ καὶ στατικά. τίς λέγει ταῦτα; μόνος Χρύσιππος [fr. 54 S.V.F.II p. 20] καὶ Ζήνων [fr. 48 S.V.F. I p.16] καὶ Κλεάνθης [fr. 483 S.V.F. I p.108]; Ἀντισθένης δ' οὐ λέγει; καὶ τίς ἐστιν ὁ γεγραφὼς ὅτι "ἀρχὴ παιδεύσεως ἡ τῶν ὀνομάτων ἐπίσκεψις;" Σωκράτης δ' οὐ λέγει; καὶ περὶ τίνος γράφει Ξενοφῶν [mem. IV 6, 1 sgg.] ὅτι ἤρχετο ἀπὸ τῆς τῶν ὀνομάτων ἐπισκέψεως, τί σημαίνει ἕκαστον;